البكاء على الاطلال.. تميم البرغوثي

يا تاكسي حود عشان أبكي على الأطلال
شارعين و في التالت يبقى اكسر يمين في شمال
في عيادة على الناصية يافطتها نيون أزرق
و كشك مقفول قصادو مكوجي و بقال
مفضلش في الحي إلا عرستين شبهة
وقط مخبر كأنو بيبص من جرنال
مفضلش من بيت حبيبتي إلا حبل غسيل
ثابت على البلكونة في موقعه مازال
دي حكمة الدنيا في الشعر الرومانسي يا بيه
حبل الغسيل سابقا كان اسمو حبل وصال

قالولي اكتب عن الشعر اللي بالك فيه
قلتلهم العشق علة لا يصيب البال
عمرك سمعت بني آدم في بالو يحب
لازم يطب و حبايبو يقولو عنو شوال
العشق علة تصيب المرء في ودانو
يفضل مبلم ولا يسمع كلام يتقال
تقولو دي حمارة يا ابني يقول دي بغل أبيض
وفرق واضح كبير بين حمير و بغال
ان شالله خلة سنان ملفوفة في كلينكس
ان شالله دبابة لو مشيت يقوم زلزال

شوف الأحبة على الكورنيش و في التحرير
شاشة خيال ظل فيها أغرب الأشكال
أسمر وشعرو لاكيه أصفر
ومحبوبتو حجاب عليه بنطلون ضيق مفيش إشكال
وآنسة أنفها من منجزات العهد
ستين تلم يقولولها رايحة فين يا غزال
يمكن بيتريقوا لكنها واثقة
ان كان خطيبها انتحر من حسنها القتال
خطيبها معذور ما هو يا هي يا الحيطة
و الحيطة في طوابير برضو عليها طوال
إن كانت أجمل شوية من الشاويش برعي
تلقى أبوها طليعي و مشيها بطال
لكنها برضو بتلاقي اللي يعشقها
وكل فولة كما تعلم لها كيال

العشق شغال في مصر برغم بلاويها
يمكن مفيش إلا هو في البلد شغال
يا صاحبي حب ولو كان الحبيب تعبان
هتفصلو وانت لاترزي ولا مثال
ما مصر كانت بهية أصبحت بتعة
بتنتع النتعة توقع في الصحاري جبال
ركبها واجعاها من وقفتها في التواريخ
تنوي الصلاة في رجب تركع على شوال
مفضلش من مصر إلا لمعة في عينيها
ودقة على الدقن مش باينة نجوم و هلال
كبرت و أعصابها باظت قاعدة على الناصية
تحدف على الخق طوب عمال على بطال
لكن أهو تعمل ايه يعني هتكرهها
خدها كدة وربنا يعينك على الأهوال
العشق زي الهوى مليان عوادم بس
لو يوم قفشت عليه راح تتخنق في الحال
يا مصر قومي هنتمشى على الكورنيش
حبي انهاردة و بكرة يحلها الحلال